¿Quién somos?
Electra Norte ye un grupu empresarial dedicáu a la xeneración y espardimientu d’enerxía llétrico asina como a dar a terceros servicios téunicos venceyaos con dambes xeres.
Apurrimos enerxía llétrico a más de 4.500 veceros y producimos lletricidá a partir d’estremaes fontes renovables.
Más d’ochenta y cinco años d’esperiencia na estaya llétrica, amestaos a la flexibilidá de la compañía, fáennos ser una empresa áxil y anovadora, capaz de desondolcar servicios y guetar soluciones afayadices pa los nuesos veceros.
Electra Norte desendolca toles sos xeres col máximu respetu al mediu ambiente.
Hestoria
En 1923 entama’l so camín na fastera central d’Asturies una empresa pequeña dedicada al suministru d’enerxía llétrico. Una década depués yá surtía a más de cincuenta pueblos de los conceyos de Siero y Bimenes. Depués de superar les
dificultaes de la posguerra, lleváronse alantre les grandes obres de lletrificación de la fastera. De magar entós heboun gran espardimientu del consumu y l’esfuerzu inversor centróse n’ameyorar les conducciones llétriques. Asina mesmo, en 1965, la empresa distribuidora garró la razón social qu’entá caltién: Electra de Carbayín. Na década de los setenta completóse’l zarramientu de tolos circuitos llétricos xenerales y nos dos últimos decenios del sieglu XX lleváronse alantre bien d’obres de renovación y ameyoramientu de les llinies de media y baxa tensión.
A finales de la década de los noventa camúdase’l marcu normativu de la estaya llétrica, lo que fai que la compañía se diversifique hacia otros negocios. Naz asina Electra Norte, p’afitar y esplotar proyeutos de toa mena venceyaos cola xeneración y comercialización d’enerxía llétrico. A lo llargo d’esti tiempu, la empresa foi pionera na conexón a la rede de plantes fotovoltaiques, na venta d’enerxía verde, nel allugamientu de parques eólicos o nel aprovechamientu de nuevos recursos enerxéticos renovables.
Electra Norte ye, anguaño, un grupu empresarial que desendolca les xeres d’espardimientu, xeneración y ufierta de servicios a terceros, tanto n’España como n’otros países.